Sabse Sasta Musalman Ka Khoon, Aakhir Kyon? 

is vaqt aalam-e islam bad tareen insani aur akhlaqi buhran se dochaar hay. 2001 se afghanistan aur 2003 se iraq me america ki qayadat me hone vali fauji karvahi se dono mumalik ki eent se eent baja di gayi.

sabse sasta musalman ka khoon, aakhir kyon? afghanistan ke bare me kaha gaya hay ki september 2011 ke muljim osama bin laden ki qayadat me america aur maghribi mumalik ke khilaf badtareen dahshat gardana hamle hue to iraq me jang ke liye saddam husayn ke jangi aur kushada iraado ko nakaam banane aur saddam husayn ko iktedar se bedakhal karne ke lie jange shuru ki gayi. in dono mumalik par hamlo ke lie kaee saalo se sazishe ki ja rahi thi dunya ko ye dikhane ke liye ki saddam husayn pur amn dunya ke lie khatra hayn. magar kayaam-e amn ke liye jo jang shuru ki gayi uske nataaij apne aap me intehaai sangeen o aalam-e insaniyat ko sharminda karne ke liye qaafi hayn. Iraq me 2003 me jo jang shuru hui thi 2007 me america ne to us se apna palla jhaad liya magar us jang ke baad islami dunya ke us taqatvar aur mazboot mulk me jo khana jangi ka silsila shuru hua hay vo aaj tak nahi thama hay. usne poore ilaqe ko lapet me le liya hay had to ye ho gayi hay ki poora khitta badtareen khana jangi o biradar kushi ki misal ban gaya hay. america ne dava kiya tha ki ebatabad me uski fauji karvahi ke bad osama bin laden ka naamo nishan mita diya gaya hay. lekin ye bat poori dunya janti hay ki afghanistan me amn abhi tak bahal nahi hua hay aur vahaan se buri tarah ki dahshat gardana vaardaton ki khabren har roz aati rahti hayn. america afghanistan se apni fauji karvahiyo se kinara kashi ka aylan kar chuka hay magar aaj tak afganistan ke halaat is qadar kabu ke bahar the jiska andaza guzishta roz afganistan ki parleament me haaliya khudkhush dahshatgard vaaqiye se lagaya ja sakta hay. 2011 me maghribi asia ke arab aur deegar islami mumallik me jamhooriyat ke qayaam ke liye tahreeqaat shuru hui jo in mumalik ke hukmrano aur chele - chapato ki manmaani policies aur aavaami zarooriyaat ko nazar andaz karne ke khilaf aylaan-e baghavat thi. magar ye tahreeqaat 1-2 mumalik ke alava kaheen kamyab nahi ho payi aur aaj vo tamam mumalik jahaa ye tahreeqaat shuru hui thi badtareen buhran o adm-e istehkam ke shikar hayn. aaj alami idaaro se vabasta log aur tanjeemaat ki tamam koshishaat, jangi karvahiyo ke bavajood afganistan, Iraq aur Sham (Syria) jayse mumalik me insani hukook ki khilaf varziyo ko rokne aur jamhooriyat ke qayaam me kamyab nahi ho sake. khud aqvam muttahida ke idaare is baat ki taraf ishara karte hayn ki 2011 ke baad 2777 shahariyo ki halakat hui thi. aqvaam muttahida ke mutabiq ye amvaat zyadatar 70% se zyada taliban ki karvahiyo ka nateeja tha. 2011 ki washington report ke mutabiq in vaardaat me 1462 ayse log maare gae jo fauji nahi the aur har roz shahari halakat me izafa hota ja raha tha. 6 maheeno me ye halakaat 3021 tak pahunch gayi. 2013 me 2959 afganistani maare gaye report ke mutabiq in sab vardaat ke peeche hukoomat ke mukhalif taaqato ka hath tha. Watson Institute for International Studies ke mutabiq afganistan me jang ke nateejatan 21000 shahari log maare gaye the. aqvaam muttahida ke mutabiq 2001 se hone vali jang me afganistan se bhagkar jane vale muhazareen ki tadaad 2013 tak 22 lakh aur beghar hone vaale 5,47,550 log the. maghribi asia me Sham ke mahaaz par is khitte ki badtareen insani hukook ko paamaali ki misaalen dekhne me aa rahi thi. aqvaam muttahida ne 2 january 2013 tak 60 hazaar se zyada logo ke maare jaane ki bat kahi thi. Aqvam Muttahida me insani huqooq ki comissioner brenda pulley ke mutabiq zaameeni haqeeqaten ummeed se zyada chaunka dene vali hongi. uske baad Aqvaam Muttahida (United States) ne is ladaai me marne vale ligo ki tadaad 80 hazar bataai gayi. is par afsos zahir karte hue UNICEF ne apne aadaad o shumaar me bataya tha ki february 2012 tak 500 bachche halaak hue the. jabki 400 bachchon ko qayd kar syria ki jelo me qayd kar sakht taqaaleef dee thi. halanki Sham ki huqoomat is baat ka inkar karti hay. 20 August 2014 me united states ne sham se halaak logo ki tadaad 1,91,369 thi. is bohran ke bad Sham se logo ne hijrat ki aur 2015 tak Turkey me 1700000 panaah haasil kar chuke the. sitambar 2014 me united states ne Sham ke muhajireen ki tadaad 30 lakh bataai thi. Iraq me khana jangi aur americi jangi karvahi se nateejatan khaufnak tabahi machi. peene ke liye saf pani na milne ke vajah se bahut si beemariya fayli, jinhone sabse zyada bachchon ko chapet me liya. 2007 me ek survey ke mutabiq iraq me 60-70% bachche nafsiyaati beemariyo ke shikar hue. america ke white phosphorus ka istmal karne se apaahij o maazoor bachchon ki paydaish me behad izafa hua. 2011 me Iraq chhodkar Urdun, Sham aur deegar mumalik me hijrat karne vale Iraqiyo ki tadaad bhi 30 lakh bataai gayi hay. junoobi aur mashriqi asia ke mumalik myanmar me ruhingya muhajireen ka buhran bhi surkhiyo me raha hay. U.S. ka commissioner baraae muhajireen ke mutabiq insani ismiling karne vale log 25 hazar se zyada the. kaee muhajireen indonesia, malaysia aur thailand me maare gae aur is vaqt 32000 muhajireen bangladesh ke 2 camps me rah rahe hayn. ruhingya muhajireen ki tadaad 1 lakh 10 hazar bataai gayi hay. ye mazloom log 3 hazar kashtiyo me baythkar kaee mumalik ke chakkar lagate rahe aur poori dunya milkar bhi kuch nahi kar saki. qaaraeen aap in baato par kya raay rakhte hayn hame niche comment me zaroor bataaiega  Note: Deen ka payghaam ghar-ghar pahunchane me hamari madad karein aur post ko zyada se zyada tadaad me Share karein apni raay hame comment box me lazmi den.